GLOSSE

Da Strandkorb ziagt se!

+

Wennst zu dene nach Norden nauf fahrsd, beispielmaßig noch Fehmarn, dann hockst an da Ostsee in an Strandkorb drin. Wos da außa hocka machsd, woas i ned, denn i bin no nia in an so an Korb gsessen. Der muass a ned sei, denn ma muass ned ois midmacha, was gibd.

von Josef Bauer

A Muidorfarin buid sa für ihrn Gartn so an Strandkorb ei. Weil neihocka konnst de a im Gartn. Des gehd ah ohne Ost- oda Nordsee. Da Schwiegasohn hod kemma miassn und is mid da Schwiegamama zu an Möbehaus gfahrn, des an Strandkorb vakaufd.

Sie hod na probierd und hod entschiedn, dass des passt und der Strandkorb käuflich erworben werd. Er hod dem Friedn ned traut und hod den Strandkorb-Vakäufa gfragd, wia da Strandkorb kimmd, wenn a kimmd? „Koa Problem, hod der vazoid. Da kemman zwoa Teile und de wern zammgesetzt, Des is ois koa Problem, des hamms glei“, sagd da Strandkorbvaschmatza.

Dann is a kemma da Strandkorb zur Schwiegamama und de hod glei an Schwiegasohn o‘gruafa und gsagd, dass er auf da Stoi kemma muass und den Korb aufbaun. Wia er kimmd und schaud, leng a Haufa Schachteln umanand und von zwoa Drümma konn koa Red ned sei. Jede Schraum war extra eipackt. Noch zwoa Stund hod er nimma meng und hod de Arbad eigstoid. Da Strandkorb war aba immer no ned aufbaut. Er hod sein Freind o‘telefonierd und der is kemma und hod den Strandkorb noch drei Stund hibrochd. Iatz stehd a im Gartn in seina ganzen Schönheit. So a Strandkorb konn se ganz schee ziagn.

Da Schwiegasohn hod an ganz an narrischen Grant ghabd und hod des Möbehaus o‘gruafa und se sauba beschwert. De ham eahm an Gutschein für 50 Euro gschickt. Da is aba draufgstandn, wenn eahm der Service gfoin hod, soid a doch was spendn. De Numma is a dabei gstandn. Da is da Grant mit Macht retour kemma. Beschwerd hod a se aba nimma.

Kommentare